Հայաստանի Ներքին Գետաշեն գյուղում գտնվող փոքրիկ կիսավեր ժամատունը երևի ոչ մեկին չէր հետաքրքրում։ Ոչ մեկին, բացի այդ գյուղի նախկին բնակչին, որը հիմա ապրում է Ռուսաստանում։ Նա վաղուց էր ուզում վերականգնել ժամատունը, բայց մտքով անգամ չէր անցնում, որ արդյունքում շուրջ 300 հնագույն խաչքար ու տապանաքար է հայտնաբերելու։
Երևանից մինչև Գեղարքունիքի մարզի Ներքին Գետաշեն գյուղ կարելի է հասնել 2.5 ժամում։
Գյուղի ժամատան վերականգնման աշխատանքների արդյունքում այստեղ մի քանի շաբաթ առաջ հայտնաբերած խաչքարերն ու տապանաքարերը պետք է սեփական աչքերով տեսնել։ Հնագետներն այստեղ դեռ չեն եկել, ինչ-որ բանի են սպասում։ Իսկ մենք սպասել չէինք կարող։
Բացառիկ գտածոների հետ կապված պատմությունը մեզ խոստացավ պատմել քրդագետ Կարեն Հովհաննիսյանը, որի ծնողները ծնունդով Ներքին Գետաշենից են։ Կարենի հետ պայմանավորվեցինք հանդիպել հենց գյուղում։
