Պոլսո Հայոց պատրիարքի նախկին փոխանորդ Արամ արքեպիսկոպոս Աթեշյանը հերթական անգամ երախտագիտություն է հայտնել Թուրքիայի իշխող «Արդարություն և զարգացում» կուսակցության նախագահ Ռեջեփ Թայիփ Էրդողանին: Օրերս Դիարբեքիր և հայրենի Սիլվան կատարած այցից հետո Աթեշյանը «Անադոլու» գործակալության հետ զրույցում պնդել է, որ «Արդարություն և զարգացում» կուսակցության իշխանության տարիներին Թուրքիայի փոքրամասնությունների և, մասնավորապես, հայ համայնքի կյանքում դրական փոփոխություններ են գրանցվել:
Նա նշել է, թե հայերը շատ դժվարություններ են ունեցել Թուրքիայի պատմության հանրապետական շրջանում, սակայն սկսած 2002 թվականից՝ ԱԶԿ-ի իշխանության գալուց ի վեր իրավիճակը փոխվել է: «Նախկինում մարդիկ չէին համարձակվում ասել, որ քրիստոնյա են: Մեր, հույների, հրեաների և բուլղարների հիմնադրամները ոչնչացնելու համար գույքի հազարավոր միավորներ խլվեցին: Այն ժամանակ նախագահի կամ վարչապետի հետ հանդիպելն անգամ երազ էր:
«Արդարություն և զարգացում» կուսակցության իշխանության գալով՝ զգացինք, որ իսկապես գոյություն ունենք: Մեզ վերադարձրին մեր ինքնությունը, գույքի մի մասը: Այս ամենը իշխող կուսակցության և նախագահի շնորհիվ եղավ, ինչի համար նրանց պարտական ենք»,-ասել է Աթեշյանը՝ հավելելով, որ ներկայիս կառավարության օրոք լուծում են ստացել մի շարք կարևոր խնդիրներ՝ դյուրացել է կրոնական պատկանելության փոփոխման գործընթացը, եկեղեցիների վերանորոգման հարցը:
