Իսլամ ընդունած հայերի թեման տաբու չէ, բայց այդ մասին դժկամությամբ են խոսում, չէ որ շատերն այլ հավատ են ընդունում ոչ թե ճնշման ազդեցությամբ, այլ սեփական կամքով։ Ի՞նչը կարող է հային այդպիսի քայլի դրդել և որքանո՞վ է դա վտանգ ներկայացնում ազգային անվտանգության տեսանկյունից։
Մամուլում տեղեկություններ են հայտնվել, որ վերջին ամիսներին ավելի հաճախակի են դարձել ՀՀ քաղաքացիների կողմից իսլամ ընդունելու դեպքերը։ Խոսքն ազգությամբ հայերի մասին է, որոնք նախկինում քրիստոնյա են եղել կամ աթեիստական աշխարհայացք են ունեցել։ Շաբաթվա սկզբին հայտնի դարձավ հերթական նմանատիպ դեպքի մասին, որը թույլ տվեց նկատել փաստացի արդեն մշակված մեխանիզմ, որի ստեղծման մեջ «չեչենական հետք» է երևում։
Չեչնիայի Հանրապետության մի քանի առցանց և տպագիր պարբերականներ օրերս նյութեր են հրապարակել այն մասին, որ մուֆթի Սալահ Հաջի Մեժիևի հավանությամբ մայրաքաղաքի մայր մզկիթում իսլամի ընդունման ընթացակարգ է անցկացվել Երևանի բնակիչ Ռոբերտ Դավթյանի համար, որը հատուկ դրա համար ժամանել էր Գրոզնի:
