Ռուսաստանի, Հայաստանի եւ Ադրբեջանի հոգեւոր առաջնորդները Մոսկվայում կայացած եռակողմ հանդիպմանը կոչ են արել պարզաբանել Լեռնային Ղարաբաղում հակամարտության ընթացքում անհայտ կորածների ճակատագիրը, հեշտացնել ռազմագերիների ազատ արձակումը եւ կանխել զենքի օգտագործումը տարածաշրջանում, որը վտանգում է խաղաղ բնակիչների կյանքը, հաղորդում է «ՌԻԱ Նովոստի»-ն:
Պատրիարք Կիրիլը չորեքշաբթի Դանիլովի վանքում եռակողմ բանակցություններ է վարել Ամենայն Հայոց կաթողիկոս Գարեգին Երկրորդի եւ Կովկասի մահմեդականների վարչության նախագահ շեյխ-ուլ-իսլամ Ալլահշուքյուր Փաշազադեի հետ: Նախօրեին պատրիարքը հանդիպել էր նրանցից յուրաքանչյուրի հետ առանձին:
«Մենք կոչ ենք անում պարզաբանել անհայտ կորածների ճակատագիրը, հեշտացնել ռազմագերիների ազատ արձակման գործընթացը եւ կանխել զենքի չարտոնված օգտագործումը, որը սպառնում է խաղաղ բնակիչների կյանքին»,- ասվում է հոգեւոր առաջնորդների եզրափակիչ հայտարարության մեջ:
Նրանք նաեւ կոչ են արել հարգել պաշտամունքային օբյեկտները, գերեզմանոցները եւ պատմական հուշարձանները Լեռնային Ղարաբաղում:
