Իսրայել մեկնող զբոսաշրջիկը Սուրբ հողի վրա ոտք դնելու փոխարեն կարող է պարզապես հայտնվել զբոսաշրջիկների համար նախատեսված մեկուսարանում։ Թեման հետաքննել է Sputnik Արմենիայի թղթակիցն ու զրուցել ոլորտի մասնագետների և դժոխային օրեր ապրած հայ զբոսաշրջիկների հետ։
Մարիաննա Փայտյան, Sputnik Արմենիա
59 ժամ․․․ Հենց այսքան են Գայանե Մանուկյանն ու ամուսինն անցկացրել Իսրայելի «տուրիստական մեկուսարանում»։ Պատմելիս նորից վերապրում է զգացած վախը, զզվանքը․ ամեն մի մանրուք՝ հոտ, ձայն մեխվել են հիշողության մեջ։ Մեկնել էին Իսրայել՝ ամուսնու 50-ամյակը նշելու, արդյունքում՝ ապրեցին դժոխային 59 ժամ։ Մեկնելուց առաջ մտքներով չէր էլ անցնում, որ Իսրայելի մուտքի արտոնագիր ստանալն ու այդ երկիր մուտք գործելը տարբեր բաներ են։ Ամենապատասխանատու փորձությունը սպասվում է Իսրայելի օդանավակայանում, որտեղ սահմանապահ ծառայությունն է որոշում՝ արդյո՞ք արժե քեզ երկիր թողնել, թե ոչ։
